 |
| Rais Kikwete akipokea Mwenge wa Uhuru ktoka kwa kiongozi wa Mbio za Mwenge wa Uhuru 2012 Capt Honest Erenest Mwanosa katika kilele cha mbio za Mwenge wa Uhuru 2012 katika uwanja wa Kambarage mjini Shinyanga. |
 |
| Waziri Mkuu wa Tanzania Mhe. Mizengo Pinda akiwasha Mwenge wa Uhuru katika uwanja wa Sokoine jijini Mbeya Mei 11, 2012 |
HOTUBA YA RAIS JAKAYA KIKWETE KWENYE MAADHIMISHO YA KILELE CHA MBIO
ZA MWENGE WA UHURU NA KUMBUKUMBU YA BABA WA TAIFA MWALIMU JULIUS NYERERE
OKTOBA 14, 2012
Dk. Fenella Mukangara (Mb) Waziri wa Habari Vijana, Utamaduni na Michezo;
Mheshimiwa Zainabu Omari, Waziri wa Ustawi wa Jamii Maendeleo ya Vijana, Wanawake na Watoto – Zanzibar;
Waheshimiwa Mawaziri na Naibu Mawaziri wa Serikali ya Jamhuri ya Muungano wa Tanzania na Serikali ya Mapinduzi Zanzibar;
Mheshimiwa Ali Nassoro Lufunga, Mkuu wa Mkoa wa Shinyanga;
Mama yetu mpendwa Mama Maria Nyerere;
Wageni Waalikwa;
Mabibi na Mabwana:
Ndugu Wananchi;
Shukrani
Ndugu wananchi;
Naomba nianze kwa kumshukuru Mwenyezi Mungu, mwingi wa rehema, kwa
kutujalia uzima na kutuwezesha kukutana tena mwaka huu kuadhimisha
kilele cha Mbio za Mwenge, kumkumbuka Baba yetu wa Taifa, na Wiki ya
Vijana. Naungana na viongozi waliotangulia kuwashukuru viongozi wa Mkoa
wa Shinyanga pamoja na wananchi wote wa mkoa huu kwa mambo mawili.
Kwanza kwa kukubali kuwa mwenyeji wa maadhimisho haya. Ni jukumu kubwa
na zito, lakini wenzetu mmelipokea kwa mikono miwili na kulitekeleza kwa
ufanisi mkubwa. Asanteni sana. Pili, nawashukuru kwa mapokezi mazuri.
Naomba radhi kwa kushindwa kufika jana kutokana na matukio yaliyotokea
Dar es Salaam.
Namshukuru pia Mheshimiwa Dkt. Fenella Mukangara, Waziri wa Habari,
Vijana, Utamaduni na Michezo na Mheshimiwa Zainabu Omari, Waziri
mwenzake kutoka Zanzibar kwa kunialika kuja kuungana nanyi na Watanzania
wengine popote walipo kushiriki kwenye maadhimisho haya adhimu kwa
taifa yanayofanyika hapa Shinyanga mwaka huu.
Ndugu Wananchi;
Nawapongeza pia Mawaziri, Naibu Mawaziri, Wakuu wa Mikoa na Wilaya
pamoja na watumishi wote wa Serikali ya Muungano na Serikali ya
Mapinduzi Zanzibar, bila kuwasahau wajumbe wote wa kamati mbalimbali,
walioshiriki katika kuratibu mbio za Mwenge wa Uhuru mwaka huu. Mipango
yao mizuri na umakini wao katika utekelezaji ndio imewezesha Mbio za
Mwenge wa Uhuru mwaka huu kufanyika nchi nzima kwa mafanikio makubwa.
Hongereni sana.
Ndugu Wananchi;
Kwa namna ya pekee nawapongeza kwa dhati vijana wetu waliokabidhiwa
jukumu la kukimbiza Mwenge wa Uhuru kitaifa mwaka huu. Wamefanya kazi
kubwa na nzuri. Mwenge wameufikisha salama, unang’ara kama
walivyokabidhiwa. Pia, wamefikisha ujumbe wa Mwenge kwa ufasaha mkubwa.
Nimeambiwa mbio za mwaka huu zimefana sana. Kila mahali Mwenge wa
Uhuru ulipokelewa vizuri na wananchi walijitokeza kwa wingi kushiriki
katika shughuli za Mwenge ikiwa ni pamoja na shughuli mbalimbali za
maendeleo.
Napenda kuchukua nafasi hii pia kuwapongeza wananchi wote walioshiriki
kwa namna moja au nyingine kufanikisha Mbio za Mwenge wa Uhuru mwaka
huu. Hamasa yenu inatupa nguvu na kutufanya tuongeze bidii zaidi ya
kuboresha Mbio za Mwenge miaka ijayo. Navipongeza sana vyombo vya habari
nchini kwa kuwa pamoja nasi katika kutangaza msafara wa Mwenge na
kuwahimiza wananchi washiriki kwenye za Mbio za Mwenge wa Uhuru. Wenzetu
hawa wametusaidia sana kufikia malengo yetu. Asanteni sana.
Kumbukumbu ya Baba wa Taifa
Ndugu wananchi;
Kama nilivyosema awali, pamoja na kuwa ni Kilele cha Mbio za Mwenge wa
Uhuru, siku ya leo pia tunaadhimisha miaka kumi na tatu tangu Baba wa
Taifa Mwalimu Julius Kambarage Nyerere alipotangulia mbele ya haki.
Miaka hiyo ni mingi kwa mwanadamu kusahaulika baada ya kufariki, lakini
siyo hivyo kwa Baba wa Taifa, Mwalimu Julius Kambarage Nyerere.
Hasahauliki na kamwe hatasahaulika kwa sababu ya mema mengi aliyoifanyia
nchi yetu na watu wake. Ameongoza harakati za kudai uhuru wa nchi yetu
kwa njia ya amani mpaka ukapatikana. Kwa miaka 23 ameongoza juhudi za
kujenga taifa jipya la Tanganyika na baadaye la Tanzania. Ametuachia
nchi nzuri ya watu wenye umoja, upendo, mshikamano, amani na utulivu
licha ya watu wake kuwa na tofauti za rangi, kabila, dini, hali zao za
kiuchumi na maeneo watokayo.Na licha ya kuwa nchi yetu imetokana na nchi
mbili kuungana.
Ndugu Wananchi;
Tofauti hizo miongoni mwa raia wa nchi hii ni sababu tosha ya watu kuwa
na migawanyiko, uhasama baina yao na ukosefu wa amani na utulivu.
Bahati nzuri, na kwa mshangano wa wengi, nchi yetu imekuwa kisiwa cha
amani na utulivu. Wahenga walisema “usione vinaelea vimeundwa”. Hakuna
mtu mwingine wa kushukuriwa na kutambuliwa kwa kuifanya hali hiyo iwe,
zaidi ya Baba wa Taifa hayati Mwalimu Julius Kambarage Nyerere.
Alibuni na kutekeleza Sera nzuri zilizowajumuisha Watanzania wote katika
shughuli muhimu zihusuzo nchi yao bila ya ubaguzi. Sera nzuri
zilizohakikisha raia wote wanapata haki zao za msingi kwa usawa bila ya
kubaguliwa kwa sababu ya rangi zao, makabila yao, dini zao au maeneo
watokayo. Sera nzuri zilizopinga na kuzuia dhuluma, unyanyasaji,
ukandamizaji na uonevu dhidi ya raia. Hiyo ndiyo siri ya utulivu na
amani ya Tanzania.
Ndugu Zangu, Watanzania Wenzangu;
Hakuna jambo kubwa na la heshima kubwa tunayoweza kumfanyia katika
kumkumbuka Baba wa Taifa siku ya leo zaidi ya kuzingatia sera hizo za
msingi zilizojenga umoja, amani na utulivu wa nchi yetu na watu wake.
Tanzania ni miongoni mwa nchi chache Barani Afrika ambazo hazizalishi
wakimbizi bali tumekuwa tunapokea wakimbizi. Hivyo basi lazima tuzienzi
na kuzidumisha sera hizo kama tunataka amani na utulivu vidumu.
Tusiwape nafasi watu wanaotaka au kufanya vitendo vya kutuvurugia sera
hizo nzuri, wawe ni watu binafsi, kikundi cha watu au vyama vya siasa.
Watu hao hawaitakii mema nchi yetu na watu wake. Tukiwapa nafasi na
tukawaendekeza tutaingia kwenye maangamizi sisi wenyewe.
Nafarijika sana kuona Watanzania wakiendelea kukataa ushawishi wa
kugawanywa kwa rangi, makabila na dini bali wamekuwa wanasisitiza kuwa
wamoja na wenye mshikamano licha ya tofauti zao hizo. Na huo ndiyo
ujumbe mkuu wa Mwenge tangu kuasisiwa kwa wazo la kuwasha Mwenge kabla
ya uhuru na kuwepo kwa Mbio za Mwenge baada ya Uhuru.
Ndugu Wananchi;
Jana kule Dar es Salaam nilitembelea makanisa yaliyovunjwa na
wanaharakati wa Kiislamu kufuatia tukio la kusikitisha la kijana mmoja
kukojolea kitabu kitakatifu cha Waislamu, yaani “Quran Tukufu”. Kijana
huyu alifanya kosa kubwa pamoja na mazingira ya utoto wake na mwenzake.
Waislamu wanayo haki ya kukasirika. Lakini pamoja na kukasirishwa kwao,
na wao kuvamia makanisa matano kuyabomoa, kuharibu vifaa pamoja na
magari, haikuwa sahihi hata kidogo. Kijana huyo hakutumwa na Kanisa
wala na mtu yeyote. Ni matokeo ya ubishani wake na mtoto mwenzake.
Isitoshe tayari alikuwa mikoni mwa Polisi kwa hatua zipasazo za
kisheria.
Watu kwenda Kituo cha Polisi kutaka wakabidhiwe mtoto yule wamuadhibu
wao haikuwa sawa. Nchi yetu inaongozwa kwa kuzingatia na kuheshimu
sheria, tuache sheria ichukue mkondo wake. Na baada ya hapo watu
kuvamia makanisa na kufanya uharibifu niliouona nalo lilikuwa ni kosa la
kusikitisha na lisilokuwa na maelezo yanayotosheleza. Nilisema jana,
na napenda kurudia tena leo kuwa ndugu zangu tujiepushe na matendo ya
namna ile. Hayajengi bali yanabomoa. Hayatoi jawabu kwa matatizo
yanayotukabili bali yanakwaza wahusika, waathirika na jamii kwa ujumla.
Yanaleta ugumu katika kupata ufumbuzi wa matatizo yenyewe. Isitoshe
yanaleta wasiwasi usiostahili kuwepo katika jamii na nchi kwa jumla.
Niliwasihi viongozi wa dini wa pande zote mbili kujiepusha na jazba na
kulipiza kisasi. Niliwaomba Waache vyombo vya sheria vifanye kazi
yake. Yule kijana yuko mikononi mwa Polisi, halikadhalika na
wanaharakati 122 wa Kiislamu nao hivyo hivyo.
Kauli Mbiu ya Mbio za Mwenge wa Uhuru Mwaka 2012
Ndugu wananchi;
Kama tulivyomsikia Mheshimiwa Waziri akitueleza muda mfupi uliopita,
kila mwaka Mbio za Mwenye huwa na ujumbe maalum. Mwaka huu ujumbe
ulikuwa “Sensa ni Msingi wa Mipango ya Maendeleo Yetu, Shiriki
Kuhesabiwa Tarehe 26 Agosti 2012”. Kauli mbiu hii ilikuwa muafaka
kabisa kwani kama mtakavyokumbuka kuwa tarehe 26 Agosti hadi 1 Septemba,
2012 katika nchi yetu kulifanyika zoezi la Sensa ya Watu na Makazi.
Zoezi hilo lilifanyika kwa mafanikio makubwa pamoja na kuwapo kwa
changamoto ndogo na kubwa. Bila ya shaka, Mbio za Mwenge wa Uhuru mwaka
huu na Kauli mbiu yake hiyo imechangia katika mafanikio haya.
Ndugu Wananchi;
Pamoja na ujumbe huu wa jumla, Mwenge wa Uhuru uliendelea kuwahimiza
wananchi kushiriki katika mambo muhimu kwa mustakabali mwema wa taifa
letu na jamii. Miongoni mwa mambo hayo ni pamoja na wananchi kushiriki
katika mchakato wa mabadiliko ya Katiba na kuendeleza mapambano dhidi ya
ugonjwa wa UKIMWI, dawa za kulevya na rushwa. Masuala haya yote
yalielezwa vizuri na viongozi wa msafara wa Mbio za Mwenge na ujumbe
uliwafikia walengwa.
Mabadiliko ya Katiba
Ndugu wananchi;
Mwenyekiti wa Tume ya Mabadiliko ya Katiba, Mheshimiwa Jaji Joseph Sinde
Warioba ametoa taarifa hivi majuzi kuwa zoezi la kukusanya maoni kutoka
kwa wananchi na makundi mbalimbali linaendelea vizuri. Katika awamu ya
kwanza na ya pili, Tume imefanya mikutano 842 katika mikoa 15; miwili
ya Zanzibar na 13 ya Tanzania Bara. Katika mikutano hiyo, watu 517,427
walihudhuria na waliotoa maoni yao moja kwa moja ni watu 29,514 na
waliotoa kwa njia ya maandishi ni 102,404.
Katika awamu ya tatu inayoendelea sasa, Wajumbe wa Tume wanakusanya
maoni katika mikoa tisa yaani miwili ya Visiwani na saba ya Bara. Kama
mambo yataenda vizuri kama ilivyo sasa, huenda Tume ikamaliza kazi ya
kukusanya maoni mwezi Disemba, 2012. Baada ya hapo itafuata hatua
nyingine ya kuandaa rasimu ya Katiba. Dhamira yetu ni kuona kuwa katika
uchaguzi ujao nchi yetu itakuwa na Katiba mpya inayokidhi mahitaji ya
sasa na miaka mingi ijayo.
Ndugu Wananchi;
Naomba nichukue nafasi hii kumpongeza kwa dhati Mwenyekiti wa Tume
Mheshimiwa Jaji Joseph Warioba, Makamu wa Rais na Waziri Mkuu Mstaafu,
Makamu Mwenyekiti Jaji Agustino Ramadhani, Jaji Mkuu Mstaafu, Wajumbe
wote wa Tume pamoja na Maofisa wa Tume kwa kazi nzuri wanayoendelea
kuifanya. Nawaomba waendelee na moyo huo wa kuchapa kazi mpaka
watakapokamilisha jukumu lao kubwa na la kihistoria kwa nchi yetu.
Nawaomba wananchi wa Mikoa iliyosalia waendelee kujitokeza kwa wingi
kama wanavyojitokeza sasa wenzao kutoa maoni yao pindi wajumbe wa Tume
watakapotembelea katika maeneo yao. Watoe maoni yao kwa uhuru bila woga
wala vitisho. Msikubali kutishwa wala kulishwa maneno ya kusema na mtu
yeyote. Msikubali kugeuzwa radio kaseti au santuri ya mtu. Toeni maoni
yenu mpendavyo nyie.
Ugonjwa wa UKIMWI
Ndugu wananchi;
Kuhimiza Watanzania kuendeleza mapambano dhidi ya ugonjwa wa UKIMWI
umekuwa ni ujumbe wa kudumu kwenye Mbio za Mwenge wa Uhuru tangu mwaka
2007. Tumeamua iwe hivyo kwa sababu ya ukubwa wa tatizo na haja ya
kuzidisha mapambano hayo. Huu ni mwaka wa 29 tangu maradhi ya UKIMWI
yalipogunduliwa kuwepo nchini kwa mara ya kwanza. Tangu wakati huyo
mpaka sasa watu wengi wameambukizwa na wanaendelea kuambukizwa. Watu
wengi wamepoteza maisha na wengi wanaugua hivi sasa.
Maradhi haya yamekuwa na gharama kubwa kwa taifa kwa maana ya tiba,
kupoteza nguvu kazi na mzigo wa kulea yatima. Jitihada kubwa zimekuwa
zinafanywa kupambana na maradhi haya na mafanikio makubwa yamepatikana.
Bado jitihada zaidi zinahitajika.
Ndugu Wananchi;
Kuzuia maambukizi mapya ndilo hasa lengo kuu la mkakati wa kupambana na
maradhi haya nchini. Tunataka walioambukizwa wabaki hao hao
tuwashughulikie lakini wale ambao walio salama wabakie salama. Kwa
ajili hiyo, kazi kubwa imekuwa inafanyika kuelimisha umma kuhusu UKIMWI.
Hivi sasa, karibu kila Mtanzania anajua kuwepo kwa ugonjwa wa UKIMWI,
jinsi unavyoambukiza na namna ya kujikinga. Elimu ya kujikinga na
UKIMWI tumeielekeza pia kwa watoto wetu mashuleni ili wapate ufahamu
mapema na kujinga. Hivi sasa, inawafikia asilimia 65 ya wanafunzi wa
Shule za Msingi na asilimia 80 ya Shule za Sekondari. Elimu kwa vijana
wetu ndiyo matumaini makubwa ya kutokomeza janga hili siku za usoni.
Ndugu Wananchi,
Pamoja na hayo, tumeelekeza nguvu zetu katika kuwahamasisha Watanzania
kupima afya zao ili kujua kama wako salama au wana maambukizi. Nafurahi
kwamba tangu tuzindue kampeni ya kitaifa ya upimaji UKIMWI kwa hiari,
Julai 2007 zaidi ya watu milioni 14.2 wamejitokeza kupimwa na kuifanya
Tanzania kuwa miongoni mwa nchi zinazoongoza duniani kwa upimaji wa
hiari. Kutokana na zoezi hilo, imethibitika kuwa kiwango cha maambukizi
nchini kimeshuka kutoka zaidi ya asilimia 15 miaka ya tisini hadi
asilimia 5.7 hivi sasa.
Haya ni mafanikio makubwa sana. Hata hivyo bado watu watano katika kila
watu 100 kuwa wameambukizwa ni wengi mno. Tunataka tufikie siku ambapo
hakuna hata mtu mmoja mwenye maradhi haya. Inaleta faraja kuona kuwa,
maambukizi mapya yamepungua kwa asilimia 25.
Ndugu Wananchi;
Katika zoezi la upimaji wa hiari linaloendelea, tumeweza kupata sura ya
kuaminika zaidi ya watu wenye maambukizi ya virusi vya UKIMWI nchini.
Kati ya hao, asilimia 57 tayari wanapatiwa dawa za kurefusha maisha na
asilimia 43 waliosalia watahudumiwa hali zao za ugonjwa itakapofikia
hatua ya kuhitaji dawa. Jitihada zinaendelea kufanywa kuhakikisha kuwa
mahitaji muhimu yakiwepo ya dawa na fedha yanapatikana.
Napenda kutumia nafasi hii kuwahimiza wananchi kuendelea kujitokeza
kupima kwa hiari. Inasaidia kujua kama uko salama ili ujihadhari na
kama umeambukizwa ujue namna ya kuishi kwa matumaini na kuepuka
kuambukiza wenza wao. Aidha, napenda kuwahakikishia kuwa tumejipanga
vizuri, wale wote walioathirika watapata dawa.
Ndugu Wananchi;
Narudia kuwakumbusha Watanzania wenzangu kufanya kila wawezalo
kujiepusha kupata maambukizi ya UKIMWI. Hili ni jambo linalowezekana
iwapo watu watazingatia masharti yake. Wahenga wamesema penye nia pana
njia, haya shime tuazimie kwa dhati kukataa kuambukizwa virusi vya
UKIMWI. Ziko njia kadhaa za kuambukizwa lakini kubwa zaidi ni ile
tunayoijua sote. Kila moja wetu aamue kushinda udhaifu wa moyo wake,
jambo ambalo hatuwezi kusema haliwezekani. Linawezekana. Ndiyo maana
bado sina shaka Tanzania bila UKIMWI inawezekana. Sisi serikalini
tutaendelea kuimarisha jitihada zetu ili kupunguza maambukizi mapya na
kuwahudumia vizuri zaidi walioathirika. Pia naomba tuache tabia ya
kuwabagua na kuwanyanyapaa wenzetu walioathirika.
Dawa za Kulevya
Ndugu wananchi;
Taifa letu liko katika mapambano makubwa na magumu dhidi ya
biashara na matumizi ya dawa za kulevya. Biashara imekuwa kubwa na
idadi ya watumiaji imeongezeka sana na maeneo yenye tatizo hili hapa
nchini nayo yameongezeka. Zaidi ya bangi na mirungi, watu sasa
wanatumia dawa za kulevya ngeni kutoka nje kama vile heroin, cocaine, na
nyinginezo.
Matumizi ya dawa za kulevya huambatana na athari mbaya za kiafya,
kijamii na kiuchumi. Baadhi ya athari hizo ni magonjwa mbalimbali
yakiwemo magonjwa ya akili, moyo, figo, kifua kikuu na UKIMWI. Vilevile
matumizi ya dawa za kulevya yanasababisha uhalifu kuongezeka, nguvu kazi
muhimu ya taifa kupotea, watoto wa mitaani kuongezeka na vifo
vinavyoweza kuepukika. Kinachosikitisha zaidi ni ule ukweli kwamba
waathirika wengi wa dawa za kulevya ni vijana wakiwemo pia wanafunzi
katika shule na vyuo.
Ndugu Wananchi;
Serikali, kupitia kwa Tume ya Kuratibu Udhibiti wa Dawa za Kulevya,
Kikosi Kazi na vyombo vingine vya dola inaendelea kukabiliana na
tatizo hili. Mafanikio ya kutia moyo yameendelea kupatikana japokuwa
bado changamoto zipo nyingi. Kwa mwaka huu 2012 hadi kufikia Agosti,
Tume kwa kushirikiana na Kikosi Kazi na vyombo vingine vya dola
imefanikiwa kukamata kilo 250 za heroin, kilo 150 za cocaine, kilo
45,458 za bangi kavu, kilo 6,215 za mirungi na kuteketeza ekari 184 za
mashamba ya bangi. Aidha, kati ya Januari hadi Agosti, 2012, watu 44
wakiwemo Watanzania na raia wa kigeni wamekamatwa na dawa za kulevya za
cocaine, heroin na kadhalika na kesi zao zipo Mahakamani.
Napenda kuwahakikishia Watanzania wenzangu kuwa tutaendeleza mapambano
dhidi ya biashara na matumizi ya dawa za kulevya nchini bila kuchoka.
Hatutakubali kushindwa. Hatuwezi kuacha taifa letu liangamie na kuwa na
vijana wengi mazezeta. Hata hivyo ili tufanikiwe kwenye vita hii,
tunahitaji sana ushirikiano wa wananchi wote. Wananchi mnawafahamu
vizuri waagizaji, wauzaji na watumiaji wa dawa za kulevya. Wengine
mnaishi nao, marafiki, jirani, ndugu na hata watoto wenu. Tafadhali
pelekeni taarifa mzijuazo kwenye taasisi na vyombo vinavyohusika ili
zifanyiwe kazi na hatua stahili zichukuliwe dhidi ya wahalifu hao.
Tusiwaonee muhali, ni hatari kwa taifa na hasara kwa jamii na familia.
Rushwa
Ndugu wananchi;
Changamoto nyingine inayolikabili taifa letu ambayo Mwenge wa
Uhuru umekuwa unaimulika ni rushwa. Sote tunafahamu kuwa taifa lolote
lile duniani haliwezi kuendelea bila kudhibiti vitendo vya rushwa na
ubadhirifu wa mali ya umma. Rushwa ni kikwazo kikubwa cha maendeleo ya
taifa na utoaji wa haki. Hivyo hatuna budi kupambana kwa dhati na
vitendo vya kutoa na kupokea rushwa nchini mwetu.
Taasisi ya Kuzuia na Kupambana na Rushwa ndicho chombo cha
mstari wa mbele katika mapambano haya. Serikali inaendelea kuweka
mazingira mazuri na kujenga uwezo wa kiutendaji wa TAKUKURU ili iweze
kutimiza ipasavyo wajibu wake. Nafurahi kuwa kazi inakwenda vizuri na
mafanikio yanazidi kupatikana. Idadi ya kesi za rushwa kubwa na ndogo
zinazopelekwa mahakamani imeongezeka.
Pamoja na mafanikio hayo bado tatizo la rushwa lipo hivyo
hatuna budi kuendeleza mapambano kwa nguvu zaidi. Napenda kutumia
nafasi hii kukumbushana kuwa vita hii sio ya Serikali na TAKUKURU peke
yake. Ni vita ya kila mtu hapa nchini, walio raia na wasiokuwa raia wa
Tanzania. Narudia kuwasihi watu wote kushirikiana na Serikali na
TAKUKURU kupiga vita rushwa. Uhakika wa mafanikio katika vita hii
utapatikana pale watu watakapokuwa jasiri kukataa kutoa rushwa au
kukataa kupokea rushwa wanapoombwa kufanya hivyo. Mafanikio yatakuwa
makubwa zaidi pale watu watakapotoa taarifa kwa TAKUKURU au vyombo vya
dola husika kwa hatua zipasazo kuchukuliwa dhidi ya wahalifu.
Kulalamikia rushwa imezidi bila ya kuwasema waombaji, watoaji na
wapokeaji rushwa haitoshi. Haitasaidia kumaliza tatizo hili ambalo
sote tunalolichukia sana.
Wiki ya Vijana Kitaifa
Ndugu wananchi;
Siku ya leo pia ni kilele cha Wiki ya Vijana Kitaifa
iliyoanza tarehe 8 Oktoba, 2012. Mbio za Mwenge, ni shughuli ya
vijana. Tangu zilipoanzishwa na Baba wa Taifa aliwakabidhi vijana
kukimbiza Mwenge, na kwenye wiki kabla ya kumalizika kwa mbio hizo
vijana hupata fursa ya kufanya na kuonyesha shughuli mbalimbali
wazifanyazo. Nafurahi kwamba utaratibu huu umedumishwa na naomba
tuendelee kuudumisha.
Hapa Shinyanga programu mbalimbali za vijana ziliandaliwa ikiwa ni
pamoja na maonesho na midahalo, kama sehemu ya kuadhimisha Wiki ya
Vijana. Kabla ya kuja hapa nimepata fursa ya kutembelea maonesho ya
vijana pamoja na ya wadau wengineo katika Viwanja vya Sabasaba mjini
hapa. Nimejionea mwenyewe jinsi vijana wanavyofanya kazi kwa bidii na
maarifa kuinua hali zao za maisha na kuchangia maendeleo ya nchi yao.
Maonesho haya yamebainisha wazi kuwa vijana wanao uwezo wa kulifanya
taifa letu kupiga hatua kubwa ya maendeleo katika nyanja mbalimbali za
uchumi na utoaji wa huduma.
Ndugu Wananchi;
Kinachotakiwa kutoka kwetu, yaani wazazi, Serikali na jamii
ni kuwajengea vijana wetu mazingira mazuri ya kufanya shughuli zao.
Kwa kutambua ukweli huo Serikali imewekeza katika kuwapatia vijana
fursa za elimu na mafunzo ya stadi za kazi. Kadhalika, kuna mifuko ya
kuwasaidia vijana kupata mikopo kutoka Serikalini, taasisi za fedha na
kupitia mashirika yasiyokuwa ya Kiserikali. Natambua kuwa mahitaji ni
makubwa kuliko rasilimali zilizopo. Ahadi yangu kwenu tutaendelea
kuongeza mafungu kwa ajili hiyo. Aidha, tutaendelea kuhimiza vijana
kupewa kipaumbele katika fursa mbalimbali zitakazojitokeza. Napenda
kuwahimiza vijana wote nchini wachangamkie fursa zitakapojitokeza na
wafanye kazi kwa bidii na maarifa. Waache uvivu na uzembe, waache
kushinda vijiweni na kulalamika bali wajitume. Mifano ya wenzao
wanaojituma ipo hata leo tumeona. Waige mifano hiyo. Serikali ipo nao
bega kwa bega, ipo tayari kuwasaidia.
Maji Mkoani Shinyanga
Ndugu wananchi;
Niruhusuni nimalizie yangu hotuba yangu kuzungumzia mambo
mawili: Jambo la kwanza ni tatizo la uhaba wa maji safi na salama Mkoani
Shinyanga na Simiyu. Serikali, kwa kutambua hilo, iliamua kuchukua
maji ya Ziwa Victoria na kuyafikisha miji ya Kahama na Shinyanga.
Katika mradi huo uliokamilika mwezi Desemba, 2008 pamoja na kuhudumia
Manispaa ya Shinyanga na mji wa Kahama, vijiji 45 vya mkoa huu na Mwanza
vimenufaika. Kazi ya upanuzi wa mradi inaendelea ili kupeleka huduma ya
maji safi kwenye vijiji 104 vilivyosalia.
Katika mwaka wa fedha 2012/2013 vijiji vinne vya Nyangomango, Isesa,
Igenge na Mbalika vimefanyiwa usanifu na ujenzi wa miundombinu
unatarajiwa kuanza hivi karibuni. Vile vile, vijiji vya Chibuji, Ndambi
na Nyang’ohonge vilivyoko wilayani Kwimba viko katika hatua ya mwisho
za kuunganishwa katika mtandao ili viweze kupata huduma hiyo.
Ndugu Wananchi;
Nyaraka za zabuni zimekamilika kwa ajili ya kupata Mkandarasi wa
kupeleka maji kwenye mji wa Muhunze ambao ni makao makuu ya wilaya ya
Kishapu. Hivi sasa taratibu za kupata fedha za kutekeleza mradi huo
zinaendelea. Vile vile, maandalizi yanaendelea ya kupata Mhandisi
Mshauri wa kufanya usanifu wa mradi wa kupeleka maji kutoka Kahama
kwenda Kagongwa hadi Tinde kupitia Isaka na vijiji vya njiani. Mambo
yakienda kama ilivyopangwa kazi inategemewa kuanza mwezi Januari, 2013.
Ndugu Wananchi;
Serikali imebuni mradi mpya wa kutumia maji ya Ziwa Victoria kutoka
kijiji cha Nasa na kuyasambaza kwenda Miji ya Bariadi, Maswa mpaka
Mwanhuzi. Tathmini ya kumpata Mhandisi Mshauri atakayefanya kazi hiyo
imekamilika. Mhandisi Mshauri anatarajia kuanza kazi hiyo mwezi
Januari, 2013. Baada ya hapo tutatafuta fedha za kutekeleza mradi huo.
Hivyo ndugu zangu wa Shinyanga na Simiyu vuteni subira, Serikali
inatambua kilio chenu cha miaka mingi na jitihada za kutafuta ufumbuzi
zinaendelea vizuri. Subira yavuta heri.
Bei ya Pamba
Ndugu wananchi;
Jambo la pili, ninalotaka kulizungumzia ni tatizo la bei ya zao la pamba
katika msimu wa mwaka huu ulioanza tarehe 2 Julai, 2012 ambao sasa
unaelekea ukingoni. Haukuwa msimu mzuri sana pamoja na mafanikio
yaliyopatikana mpaka sasa ya ununuzi wa pamba. Mpaka sasa jumla ya
makampuni 37 yanaendelea kununua na kuchambua pamba mbegu. Aidha, zaidi
ya tani 309,560 za pamba-mbegu zimenunuliwa kutoka Kanda ya Magharibi.
Na zaidi ya tani 1,700 zimenunuliwa Kanda ya Mashariki. Ununuzi bado
unaendelea katika Wilaya mbali mbali ambapo inakadiriwa kiasi cha tani
30,000 za pamba bado hazijanunuliwa toka kwa wakulima katika Wilaya za
Bariadi, Maswa na Meatu.
Ndugu Wananchi;
Kwa ujumla, ununuzi wa pamba msimu huu ulikabiliwa na changamoto kubwa
ya bei kwa mkulima kuwa ndogo tofauti na mwaka wa jana. Kiini cha
tatizo hilo ni kuporomoka kwa bei ya pamba katika soko la dunia. Mwaka
wa jana bei ya pamba katika soko la dunia ilikuwa Dola ya Marekani 1.45
sawa na shilingi 2,276 kwa ratili wakati mwaka huu ilianzia senti 83 ya
dola ya Marekani sawa na shilingi 1,303 kwa ratili na iliendelea
kushuka. Kwa sababu hiyo bei ya mkulima mwaka wa jana ilikuwa shilingi
1,100 kwa kilo wakati mwaka huu ilikuwa shilingi 660 kwa kilo. Tena,
bei hiyo ilifikiwa baada ya juhudi kubwa iliyofanywa na Serikali
ikishirikiana na Chama cha Wanunuzi wa Wachambuaji wa Pamba, Chama cha
Wakulima wa Pamba (TACOTA) pamoja na viongozi wa siasa hususan Wabunge.
Wanunuzi wa pamba walitaka kununua kwa shilingi 525 kwa kilo.
Katika jitihada za kutaka bei iongezeke njia mbalimbali zilifikiriwa.
Mojawapo ilikuwa ile ya Serikali kufidia tofauti ya bei. Njia hiyo
ilishindikana kwani ilikuwa inaibebesha bajeti ya nchi mzigo mkubwa mno
ambao haingeumudu. Iwapo ingeamuliwa iwe hivyo mipango mingi ya
maendeleo iliyopangwa ingebidi isimame. Baada ya njia hiyo
kushindikana, ikaonekana tuangalie uwezekano wa kupunguza baadhi ya tozo
zilizokuwa kwenye zao la pamba. Tulikubaliana kupunguza ushuru wa
Halmashauri kutoka asilimia 5 hadi 2, faida ya wachambuaji kutoka
asilimia 10 hadi 2. Pia, tuliondoa Kodi ya Ongezeko la Thamani (VAT) ya
asilimia 18 kwenye viwanda vya nguo. Hatua hizo ndizo zilizopandisha
bei kutoka shilingi 525 kwa kilo hadi shilingi 660 kwa kilo. Bado bei
hiyo ni nafuu kidogo, lakini ni chini mno ukilinganisha na ile ya mwaka
wa jana. Hata hivyo, ni vigumu kumlazimisha mnunuzi kulipa bei kubwa
kuliko ile atakayouzia katika soko la dunia.
Ndugu zangu, Watanzania wenzangu;
Ni vyema tukatambua kuwa hatuna uwezo wa kudhibiti bei katika soko la
dunia. Kuna miaka huwa nzuri kama mwaka jana na mingine huwa mbaya kama
mwaka huu. Lakini tatizo la bei safari hii limetufundisha mengi.
Kwanza inatupasa tuanze kuchuna bongo kutafuta mfumo mzuri wa kuleta
utulivu wa bei kwa wakulima wakati wa misukosuko mbalimbali ya kiuchumi
ndani na nje ya nchi. Nimeshatoa maelekezo kwa Wizara husika kuanza
kufanya kazi hiyo. Pili, kwamba tupunguze kutegemea mno soko la nje
kuuza pamba ghafi na tuanze safari ya kuuza pamba iliyoongezwa thamani
au bidhaa zitokanazo na pamba. Hii ina maana ya kuwa tuwe na viwanda
vingi vya nyuzi, nguo na mavazi hapa nchini vinavyotumia pamba yetu.
Jambo hilo litawezesha wakulima kupata bei nzuri kwa pamba yao bila ya
wanunuzi kuathirika vibaya.
Hitimisho
Ndugu Wananchi;
Kabla ya kuhitimisha Mbio za Mwenge wa Uhuru mwaka huu wa 2012 napenda
kuwapongeza vijana walioshiriki kwenye halaiki. Nawapongeza pia walimu
wao. Narudia pia kuwashukuru wote walioshiriki kwa namna mbalimbali
kufanikisha sherehe hizi ambazo zimefana mno. Kwenu nyote nasema
asanteni sana.
Baada ya kusema hayo sasa natamka rasmi kwamba shughuli za Mbio za
Mwenge wa Uhuru, Kumbukumbu ya Baba wa Taifa Mwalimu Julius Kambarage
Nyerere na Wiki ya Vijana Kitaifa kwa Mwaka 2012 zimefikia kilele chake.
Mungu Ibariki Afrika
Mungu Ibariki Tanzania
Asanteni sana
.JPG)
