Na
Ernest Simya, Sumbawanga
Mwamuzi
na wachezaji watatu wa timu ya Serengeti SC ya wilayani Sumbawanga mkoani
Rukwa wamelazwa kwenye kituo cha Afya cha Laela baada kushambuliwa na kwa
kupigwa sehemu mbalimbali za miili yao katika mchezo wa Ligi ya ujirani mwema.
Katika mchezo huo uliopigwa katika
uwanja wa shule ya msingi Kisalala kata ya Laela Mwamuzi wa mchezo huo Eliaza
Simsokwe ilipofika dk ya 75 alishambuliwa na kundi la mashabiki na kumvua
nguo zake wakiendelea kumpa kipigo
Kipigo hicho kilisababisha mwamuzi
huyo kujisaidia haja kubwa kipigo kinachodaiwa kutolewa na wapenzi wa timu ya Serengeti
FC wakipinga bao lililofungwa na mchezaji wa timu pinzani ya Muchiza FC, Siyaye
Mgonde wakidai alikuwa ameotea kabla ya kufunga.
Meneja wa Timu ya Serengeti FC ya
Kisalala , Andrew William alisema kuwa baada ya mwamuzi huyo kuvuliwa nguo na
kupata kipigo hicho ilibidi baadhi ya wananchi kuingilia kati na kumwokoa
hatimaye mwanamke mmoja alimsaidia kwa kumfunga khanga ya kumsitili kabla
ya kukimbizwa kituo cha Afya cha Laela
kwa ajili ya matibabu.
Katika vurugu hizo pia
wachezaji wawili na kocha watimu ya Serengeti walijeruhiwa na kulazwa kwenye
kituo hicho cha Afya pamoja na uharibifu mkubwa wa pikipiki na baiskeli 10
zilizokuwapo uwanjani hapo
Aidha ugomvi huo uliibuka tena
majira ya usiku nje ya uwanja ambako watu wanaodaiwa kuwa ni wakazi wa kijiji
cha Kisalala walivamia tena wachezaji wa timu ya Serengeti FC na kumjeruhi Peter
Willy alijeruhiwa kwa kupigwa panga kichwani na kusababishiwa jeraha kubwa.
Kufuatia hali hiyo uongozi wa Chama
cha soka wilayani Sumbawanga (SURUFA) kupitia kwa katibu wake, Kanyiki Nsokolo kimewatahadharisha
washabiki wa mchezo huo kuachana na vitendo vya vurugu kwenye michezo
mbalimbali ikiwa ni pamoja na kuwashambulia waamuzi wa mchezo kwa kuwapiga pale
wanapochezesha michezo mbalimbali.
Alisema kufanyika kwa vitendo hivyo
ni matokeo ya kuendesha masuala ya soka kienyeji pasipo kufuata taratibu ikiwa
ni pamoja mashindano hayo kufanywa pasipo kukishirikisha chama cha soka cha
wilaya sanjari na kutokuwapo kwa makocha na waamuzi wenye sifa kwa ajili
ya kuchezesha michezo mbalimbali ya soka.
